Tá Tuarascáil Chomhlacht Slat Tomhais na Seirbhíse Poiblí faighte ag an Tánaiste agus Aire Airgeadais, an tUasal Brian Ó Comhain TD, ó Chathaoirleach an Chomhlachta, an tUasal Dan O’Keefe, AS.

Clúdaíonn an Tuarascáil na mórghrúpaí uile sa tseirbhís phoiblí (seachas na barrphoist atá clúdaithe ag an gComhlacht Athbhreithnithe Ardtuarastal san Earnáil Phoiblí agus oibrithe ceirde agus gráid ghaolmhara leithéidí oibrithe ginearálta a choimsítear faoi phróiseas comhthreormhar ar leith atá os comhair na Cúirte Oibreachais faoi láthair.

Fuair Comhlacht na Slat Tomhais amach go raibh tuarastail sa tseirbhís phoiblí tríd síos, ag na leibhéil seo, cothrom go maith leis an earnáil phríobháideach. Ní mholtar aon mhéadú do thromlach mór na ngrád a scrúdaíodh.

Fuair Comhlacht na Slat Tomhais amach go raibh na pinsin ag na grúpaí sa tseirbhís phoiblí a scrúdaíodh níos luachmhaire go suntasach ná pinsin grúpaí san earnáil phríobháideach agus gur cóir luach níos airde de 12% a áireamh ar phinsin na seirbhíse poiblí.

Ag cur an lascaine pinsin san áireamh, ní mholtar méaduithe ach in 15 grád de na 109 grád a scrúdaíodh – moltar na méaduithe do chuid de na gráid is sinsearaí a scrúdaíodh. Meastar gur €50 milliún costas an mhéaduithe (méadú de 0.3% ar phábhille na ngrád a chlúdaítear sa tuarascáil).

“Beidh mé ag tuairisciú don Rialtas ar an tuarascáil an tseachtain seo chugainn. Faoi réir an Chomhaontaithe Chomhpháirtíochta Shóisialta, I dTreo 2016, pléifidh na páirtithe feidhmiú na Tuarascála i gcomhthéacs na díospóireachtaí faoi cibé socruithe maidir le pá agus coinníollacha a chuirfear i bhfeidhm nuair a bhíonn críoch leis an gcomhaontú reatha um pá sa tseirbhís phoiblí”, a dúirt an Tánaiste.

“Ba mhaith liom buíochas a ghabháil leis an gCathaoirleach Dan O’Keeffe, AS, agus le baill uile an Chomhlachta agus leis an rúnaíocht as an saothar cuimsitheach a rinne siad chun an scrúdú seo a dhéanamh agus as a dtiomantas chun an tuarascáil a chríochnú laistigh den tréimhse ama a leagadh síos”, a dúirt sé freisin.

Tá an Tuarascáil le fáil ar shuíomh gréasáin na Roinne, www.finance.gov.ie agus tá coimrú feidhmeach ag gabháil leis seo.

Is iad baill Chomhlacht Slat Tomhais na Seirbhíse Poiblí ná:

An tUasal Dan O'Keeffe A.S. C., BCL, LL.B., A.C.A. – Cathaoirleach

An tUasal Bill Attley, iar-Rúnaí Ginearálta SIPTU,

An Banuasal Olive Braiden, Cathaoirleach na Comhairle Ealaíon, iar-Chathaoirleach Earnáil an Chirt den Ghrúpa Fíoraithe Feidhmíochta,

An tUasal John Malone, Iar-Ardrúnaí na Roinne Talmhaíochta & Bia,

An tUasal Tom McKevitt, iar-Leas Rúnaí Ginearálta Chumann Feidhmiúcháin na Seirbhíse Poiblí,

An tUasal Willie Slattery, Stiúrthóir Bainistíochta, State Street International (Ireland) Teo, agus

An tOllamh Brendan Walsh, Ollamh Gradaim le hEacnamaíocht, COBÁC